La Ràdio

15 janvier 2018 - 324 vues

A prepaus de Ràdio Nissa Pantai

Bastir una ràdio occitanofòna associativa a Nissa e dins lo sud-est occitan, que trabalh !

L’iniciativa partèt dau Centre Cultural Occitan – País Nissart e Alpenc (CCÒC, aüra Nissa Pantai) e si fondèt sus dau principi qu’aicí, lo terren èra pròpi favorable a una ràdio en lenga occitana. Que de tota la region Provença-Alps-Contea de Nissa, eravam lo departament qu’avia la melhora mantenença de la lenga tant en mitan urban coma rural, estimada a 5% minimum de locutors actius que podia anar fins a 60% (estatisticas 2002-2006 sus un panel de 200 personas dins li 163 comunas departamentali). De mai si tròbava una ret associativa densa e activa que nos servia de sorgent.

Dins aqueli condicions, per 1 070 000 auditors de Mentan a Tèula e de Nissa a Sant Estève de Tiniá, que de mai normal de poder audir una ràdio en lenga d’Òc! Voliavam que lu auditors posquèsson captar au mens una ràdio en lenga noastra dins la tèrça ciutat d’Occitània e la quinta ciutat de França en estatjants, dins una zòna de renomenada internacionala (« Coasta d’Azur »), au mitan dei ràdios francofòni, d’un desenau de ràdios italianofòni, de ràdios anglofòni ò encara ebreofòni.

En matèria de mèdias, per aplicar l’article 75-1 de la Constitucion francesa, inaugureriam Ràdio NISSA PANTAI (ràdio en occitan nissart, alpin-gavoat, provençau sus www.nissapantai.com) diménegue lo 5 d’octòbre dau 2008 per la 11ena Fèsta d’Occitània dau CCÒC au teatre Francís Gag a Nissa.

En lo 2012, Ràdio Nissa Pantai pilhèt una nòva dimension en lançant l’emission FotPantai qu’avia per objècte de comentar toi lu rescòntres de l’OGC Nissa a domicili, pi lo rescòntre dau Gim au Mónegue. Inicialament diferada, la difusion de l’emission si faguèt en dirècte a comptar de setembre dau 2013 quora lo novèl estadi de Sant Isidòro siguèt inaugurat.

L’emission FotPantai a largament contribuit a la renomenada de la ràdio dins lo mitan dei suportaires dau Gim e mai en delà. De tala maniera qu’en lo 2016, l’associacion pilhèt lo nom de la ràdio, – Nissa Pantai – , en rason de la notorietat aquistada da aqueu nom.

Aquest an 2018, Ràdio Nissa Pantai festeja lu sieus 10 ans d’existéncia !

En aquesta escadença, la ràdio a passat una novèla tapa dins lo sieu desvolopament en si dotant d’un autís de comunicacion modèrne e eficaç (novèu lector, novèu site) e propaua aüra 9 emissions jornalieri:

 

- Caire Politic (emission politica)

- FotPantai (emission esportiva sus l'OGC Nissa)

- La vida en la Contea (emission de vida culturala)

- Li belugas de Cristòu (entrevistas divèrsi de personalitats locali)

- Li vísitas guidadi de Nissa en nissart (patrimòni e istòria)

- Nissa la poética (minuta leterària e poetica)

- Teatralament Nissa (redifusion de pèças de teatres en nissart) 

- Un pantais de concèrts (redifusion de concèrts de grops occitans)

- Vision dal Mond (entrevistas divèrsi sus de subjèctes culturals e politics)

 

Podètz audir de mùsicas divèrsi de tot estile de Nissa e de toti li autri regions d’Occitània tota.

Parallèlament, Ràdio Nissa Pantai entreten de boani relacions emb d’autri ràdios associativi, notadament Ràdio Lenga d’Òc emb cu coopèra activament en faguent d’escambis regulars d’emissions.

NISSA PANTAI, per que lo noastre pantais vengue realitat !

Cristòu Daurore e Sèrgi Audigier en l’estúdio de la Ràdio Nissa Pantai

Commentaires (0)

Connectez-vous pour commenter cet article