24a Dictada Occitana a Nissa en dirècte sus Ràdio Nissa Pantai

Lo dissabta 17 de genoier dau 2026 si debanerà la 24^a Dictada Occitana a Nissa, a 13h au Palais de Rei de Sardenha (10 Carriera de la Prefectura).

L’eveniment es organizat per l’escòla Calandreta Maurís Sgaravizzi e serà retransmés en dirècte sus Ràdio NIssa Pantai. Li personas que porràn pas faire lo desplaçament porràn doncas tanben participar a la dictada en escotant la ràdio.

PER PARTICIPAR A LA DICTADA EN VISIO, PICATZ AQUI

L’autora dau tèxt de la dictada serà Cristina Bovari, professora de nissard au collègi Límpia, autora e presidenta de Nissa Ti Vòli Ben [Nissa Ti Vouòli Ben]. La poetessa Paulina Kamakine vendrà legir de poèmas dei Pirenèus en gascon de Bigòrra. Enfin, Sèrgi Berardo vendrà de Piemont emb lo sieu grop Bistrò Dalfin per nos faire balar.

Au programa:

13h – Acuelh dei participants e dei personalitats
13h30 – Dictada e poesia per Cristina Bovari e Paulina Kamakine
S’enseguirà un balèti dau grop Bistrò Dalfin
Enfin: remesa dei prèmis e regals ai participants de la dictada.
17h30 – Fin de la manifestacion.

La tòca d’aquesta operacion es de redonar li sieus letras de noblessa a l’occitan nissart qu’es mai conoissut per la sieu oralitat que non pas per lu sieus escrichs. La Dictada Occitana siguèt creada a Castras en lo 1998, pi a Nissa en lo 2003. Si debana aquest an dins 38 vilas d’Occitània tota, mas tanben a París, a Barcelona e dins lo País Valencian. Dins li Aups Maritimi, si debanerà dins 4 comunas:

Coarasa, Mentan e L’Escarèa (dictada en occitan aupenc)
Nissa (doi dictadas: l’una lo 17 de genoier au Palais dei Reis de Sardenha, l’autra lo 31 au CUM)

En aquesta fèsta, si vendràn de bilhets de zèro (0) nissart dau 2021 (en l’onor dei 50 ans de Nissa Pantai – CCÒC País Nissart e Alpenc). La recèpta d’aquela venda anerà au sosten a Ràdio Lenga d’Òc per finançar la sieu preséncia au DAB+ entre Mentan e Canas.

La 24^a Dictada Occitana a Nissa es sostenguda per l’OGC Nissa, lo Conseu Departamental dei Aups Maritimi, la Region Provença-Aups-Còsta d’Azur e la República de Nissa.

Aquesta dictada si debanerà tanben dins mantu establiments escolars que dispensan de cors d’occitan nissart e aupenc a Nissa, L’Escarèa e Mentan.

Es un eveniment gratuit e dubèrt a toti e a toi. Per li personas participanti que lo desiran, li copias seràn corregidi per tres professors. Lo tèxt permetrà a toti aqueli e toi aquelu que conoisson un pauc la lenga de temptar de l’escriure. Toti li grafias son acceptadi.