Istòria

12 septembre 2018 - 44 vues

Compendi istoric de Ràdio Nissa Pantai

2002-2006

D'estatisticas, realizadi sus d'un panèl de 200 personas dins li 163 comunas dau departament dei Aups-Maritimi, establissèron que de tota la region PACA, aqueu departament avia la melhora mantenença de la lenga occitana tant en mitan urban coma rural: un minimum de 5% de locutors actius, que podia anar fins a 60%. De mai, si trobava una ret associativa densa e activa que podia servir de sorgent.

2007-2008

Foart d'aqueli estatisticas e dau constat que lo terren li èra pròpi favorable (mai d'un milion d'auditors potencials de Mentan a Tèula e de Nissa a Sant Estève d'en Tiniá), lo Centre Cultural Occitan - País Nissart e Alpenc (CCÒC) desvolopèt l'idèa de crear una oebràdio en lenga occitana.

L'idèa èra que lu auditors posquèsson captar au manco una ràdio en occitan dins la 3a ciutat d'Occitània e la 5a ciutat de França en estatjants, dins una zòna de renomenada internacionala ("Coasta d'Azur"), au mitan de ràdios francofòni, d'un desenau de ràdios italianofòni, anglofòni ò mai ebreofòni.

5 octòbre 2008

Ràdio Nissa Pantai siguèt inaugurada a l'escadença de l'11a Fèsta d'Occitània, organizada dau CCÒC au teatre Francís Gag a Nissa. Presentat lo mesme jorn, lo sieu lògo siguèt creat da l'artista Ben.

2012

Ràdio Nissa Pantai si liga au fotbòl emb la creacion de l'emission "FotPantai" que fa lu comentaris dei rescòntres de l'OGC Nissa a maion e au Mónegue.

Lu promiers rescòntres son comentats dins li tribunas de l'Estadi dau Rai e difusadi en diferat.

2013

Ràdio Nissa Pantai adòpta un novèu lògo. S'agisse de la modernizacion dau sieu ancian lògo.

Setembre 2013

Ràdio Nissa Pantai inaugura, emb la sieu emission FotPantai, lo sieu promier comentari de rescòntre de fotbòl en dirècte, a l'escadença de l'inauguracion dau novèl Estadi de Sant Isidòre dins lo quau l'OGC Nissa juega aüra toi lu sieus rescòntres a maion.

A comptar de la sason 2013-2014 de Liga 1, l'emission FotPantai es difusada sempre en dirècte.

2016

L'associacion Centre Cultural Occitan - País Nissart e Alpenc adòpta lo nom de Nissa Pantai - Centre Cultural Occitan País Nissart e Alpenc (reduch en Nissa Pantai), e càmbia de lògo per la mesma escadença.

Gràcia a l'emission FotPantai, lo nom de Nissa Pantai deven foarça popular dins lo mitan nissart.

2018

Ràdio Nissa Pantai festeja lu sieus 10 ans d'existéncia !

Aquesto desen anniversari es marcat per un desvolopament dei mejans de comunicacion de la ràdio, que propaua enfin un material de difusion e un sit modèrnes.

La 21a Fèsta d'Occitània organizada lo 7 d'octòbre dau 2018 serà consagrada ai 10 ans de la ràdio.

Commentaires(0)

Connectez-vous pour commenter cet article