Ràdio Nissa Pantai, te’n dona sempre de mai!
Es sota d’aquel eslogan que vira sus Internet, despí dau 2008, la ràdio associativa Ràdio Nissa Pantai, una webràdio que difusa 24h/24 e 7j/7 de música e d’emissions 100% en occitan nissart e alpenc.
La creacion de la ràdio partèt d’un constat simple: mentre que li Aups-Maritimi son un dei territòris dont la lenga occitana a la melhor mantenença, tant en mitan urban coma rurau, l’occitan èra esquasi completament absent dei mèdias radiofonics locaus. D’aquí nasquèt l’idèa de crear una ràdio en occitan a Nissa, 3a vila d’Occitània e 5a vila de França per nombre d’estatjants.
Despí la sieu creacion, Ràdio Nissa Pantai s’es desvolopada e a renfortit plan planin la sieu preséncia dins lo mitan nissart, alpenc e, mai largament, dins Occitània tota. La ràdio contribuisse a faire conóisser e viure la lenga occitana dins un mèdia modèrne e accessible a toi.
En lo 2018, Ràdio Nissa Pantai festegèt lu sieus 10 ans d’existéncia!
Aüra, Ràdio Nissa Pantai prepaua una programacion rica e diversificada, emb de cronicas, reportatges, entrevistas e emissions consacradi a de subjèctes fòrça divèrs, coma la cultura, l’istòria, l’actualitat, l’espòrt ò encara la vida politica. Aquesti emissions son acompanhadi de música, emb de cançons de grops occitans de toi lu estils.
D’entre li emissions que son vengudi emblematiqui de la ràdio, FotPantai ocupa una plaça particulara. Aquesta emission esportiva comenta en dirècte e en nissart lu rescòntres de fotbòl de l’OGC Nissa a maion e a Mónegue.
Corona de sera, creada en lo 2020 pendent la pandemia de Covid-19, foguèt tanben una emission importanta dins l’istòria de Ràdio Nissa Pantai. Cada setmana, permetia d’entrevistar en dirècte una personalitat dau mond cultural ò politic occitan. Per lo succès qu’a conoissut, contribuissèt, emb FotPantai, a renfortir la notorietat de la ràdio.
Ràdio Nissa Pantai entreten de partenariats emb Jornalet, Ràdio Lenga d’Òc e Ràdio Occitània.
Ràdio Nissa Pantai, te’n dona sempre de mai!
