Cronicas
As ben parlat mai de qu’as dich?
Cronicas en occitan provençau, realizada per Bernat VATON e l’associacion Ben Lèu, e difusada sus Ràdio Mix, una ràdio d’Aurenja. Son mes a l’onor lei liceans que s’exprimisson en provençau sus de subjèctes d’actualitat de tota mena.
Programacion: cada jorn a 14h30
Lo Jornalet
Cronica setmaniera d’actualitats, nomenada Lo Jornalet en referéncia a Jornalet, la gaseta occitana d’informacion gerida per l’Associacion entara Difusion d’Occitània en Catalonha (ADÒC). La cronica dona cada setmana li informacions mai recenti extrachi dei articles dau jornal occitan d’actualitats en linha.
Programacion: cada jorn a 00h00, 06h00, 12h00 e 18h00
FotPantai
FotPantai es una cronica esportiva que fa lo crompendi dei rescòntres de l’OGC Nissa de la setmana precedenta, tant en Liga 1 coma en copas d’Euròpa.
Es tanben en l’encastre de FotPantai que son comentats en dirècte lu rescòntres de l’OGC Nissa a domicili e a Mónegue.
Programacion: cada jorn a 00h30, 06h30, 12h30 e 18h30*
* En foncion dei datas de rescòntres de l’OGC Nissa a maion
Li minutas nissardi de Francís Gag
Li minutas nissardi de Francís Gag èra una cronica quotidiana en nissart difusada dau 1973 au 1976 sus Ràdio França Costiera d’Azur. Tractava indistintament de questions d’actualitat e de societat, d’anecdòtas, de sovenirs, de tradicions e de l’etnografia de la nòstra region. Li retrobam lu grands tèmas que travèrsan l’òbra de Gag: lo vilatge imaginari de Ribassiera e tot lo pòble de la montanha nissarda, ò la cobla mitica Tanta Victorina-Titon!
Aqueli cronicas revèlan da Gag lo doble cruci de parlar una lenga de qualitat tot en respectar l’espontaneïtat de l’expression populara. Es en efiech lo paradòxo de la cronica ràdio que de fintar l’improvisacion, quora es la frucha d’un autentic trabalh d’escritura.
L’art dau contaire e la construccion dei racòntes denòtan una lenga fòrça elaborada. La preocupacion pedagogica de l’autor apareisse clarament dins lo sieu biais d’introdurre au fiu dei sieus prepaus quaucu mots rars ò oblidats, que dobla de còups d’un sinonim mai corrent, e mai d’un afrós gallicisme, per assegurar la compreneson!
Consideradi coma irremediablament perdudi, li bandas magnetiqui dei “Minutas” siguèron retrobadi per la Federacion dei Associacions dau Comtat de Nissa. Après aver numerizat aqueu tresaur lingüistic, la Federacion confidèt a Pèire-Loís Gag e Miqueu Pallanca la realizacion d’aquest obratge publicat a l’ocasion dau vinten anniversari de la desaparicion de Francís Gag.
Ràdio Nissa Pantai redifusa Li minutas nissardi de Francís Gag emb l’aimabla autorizacion dau sieu fiu Pèire-Loís Gagliolo.
Programacion: cada jorn a 14h00
Nissa la poética
Minuta poetica entre doi emissions ò doi pàginas musicali, Nissa la poética vos fa descurbir la poesia occitana a travèrs la lectura de tèxts d’autors nissarts, alpencs e mai d’Occitània tota. Nissa es pas solament una vila, es finda un poèma!
Programacion: cada jorn a 00h45, 04h45, 08h45, 12h45, 16h45 e 20h45
L’occitan del jorn
Cronica de Clamenç Pech presentant cada setmana un personatge istoric d’Occitània tota. Extracha de Ràdio Occitània, aquesta cronica es redifusada per Ràdio Nissa Pantai dins l’encastre dau partenariat que liga li doi ràdios.
Programacion: cada jorn a 09h45
Entrevistas
Li belugas de Cristòu
Dont sigue, dont vague, Cristòu DAURORE si passeja dapertot emb lo sieu microfòn per capturar lu eveniments que si debanan a Nissa e entrevistar de personalitats divèrsi que rescòntra en camin. De personalitats dau mitan cultural, literari, lingüistic, politic e autre de Nissa, de Gavotina e d’Occitània tota!
“Cristòu, li sauta de belugas quora se’n va emb lo micro!”
Programacion: cada jorn a 09h00
Corona de sera
Corona de sera èra una emission setmaniera d’una ora pendent la quala èran entrevistadi en dirècte diferenti personalitats dau mitan occitan, tant cultural coma politic. Si tractava de toi lu subjèctes segon lo domeni d’activitat de la persona convidada. Ràdio Nissa Pantai ne’n redifusa en diferat toti li edicions.
Difusada dau temps de la crisi sanitària de la CoVid19, l’emission portava ben segur un nom que faïa allusion au coronavirus mas finda a la corona que figura sus l’emblèma dau Comtat de Nissa. Faïa tanben allusion au provèrbi nissart “roge de sera, bèu temps espèra”. Un biais d’esperar de temps melhors après la pandemia.
Programacion: dau diluns au divendres a 19h00
Vision dal mond, Gavotina Pantais
D’ont que siguessiatz, d’Occitània tota ò de las Alps Maritimas, avètz ja sentit parlar de Niça, de la Contea de Niça, dal niçard. Sabètz qu’existe tanben Provença e lo provençal, gràcias al Prèmi Nobel 1904, Frederic Mistral. E avètz ja ausit parlar de Lengadòc, d’Auvèrnha, etc.
Mas conoishètz Mentan, Dinha, Gap, lo Comtat de Buelh, l’Estat d’e Vile Líbere de Mentan e Recabruna? E mai conoishètz l’autre grand dialècte de la region, parlat d’Esa e Mentan fins a Briançon en passar per Puget-Teniers ò Sisteron? Es lo vivaroalpin ò gavòt.
Vision dal mond es una emission “made in Gavotina”, liura, d’actualitat e a tèmas sus la vision qu’avèm d’Occitània e dal mond entier. Son animator Laurenç REVÈST i entrevista diferentas personalitats dal mitan occitan.
Programacion: dau diluns au divendres a 17h00
Reportatges
Coïna en pantais
Coïna en pantais es una emission que vos fa descurbir la coïna nissarda a travèrs divèrs reportatges registrats a l’ocasion de diferents eveniments culinaris, especialament lu atalhiers de coïna animats per l’associacion Nissa Pantai.
Programacion: dau diluns au divendres a 11h00
La vida en la Contea
La vida en la Contea es una emission sus la vida culturala a Nissa e en la Contea. Son immortalizats toi lu eveniments culturals mai emblematics qu’animan lo nòstre país (conferéncias, festins, etc.)
Programacion: diluns e dijòus a 10h00
Li vísitas guidadi de Nissa en nissart
Emission que redifusa li vísitas guidadi de Nissa en nissart organizadi despí dau 2005 da Cristòu DAURORE en l’encastre de Nissa Pantai. L’emission vos fa viatjar dins lo temps e descurbir l’istòria e lo patrimòni dei quartiers mai emblematics de Nissa (lo Babasoc, lo Pòrt, lo Castèu, la plaça Garibaldi, Cimier, l’Abadia de Sant-Pòns…).
Programacion: dimars e divendres a 10h00
Espectacles
Un pantais de concèrts
Ràdio Nissa Pantai acòrda una granda importància a la creacion musicala d’expression occitana. L’emission Un pantais de concèrts redifusa en integralitat lu concèrts que si debanan a Nissa, dins la sieu region e mai en Occitània tota. Rock, Fòlc, raggà, trad e patin cofin, toi lu estils son representats!
Programacion: diluns e dijòus a 15h00
Teatralament Nissa
Teatralament Nissa es una emission que redifusa en integralitat toti li pèças de teatre jugadi en nissart per li chormas de teatre mai famoï de Nissa (Francís Gag, lo Ròdol Nissart, lu Bastian-Contraris, lu Tridentins, la Chorma Nissa Pantai…) emb una granda diversitat d’autors tant ancians coma actuals (Rancher, Mossa, Gag, Sauvaigo, Toscano…).
Programacion: dimars e divendres a 15h00
