A l’ocasion dau començament de la novèla sason de Liga 1 2026-27, FotPantai prepaua un novèu dispositiu innovant per seguir lu rescòntres en dirècte, tant a la ràdio coma en vidèo.
Lu comentaris seràn desenant difusat en dirècte a l’encòup sus Ràdio Nissa Pantai e sus Facebook Live a partir de la pàgina Facebook de Ràdio Nissa Pantai. Porretz ensin veire en vidèo lu comentators a l’antena per viure lo rescòntre emb elu coma se siguessiatz dins l’estúdio.
L’objectiu d’aquesto novèu format es de vos faire viure cada rescòntre au mai pròche de l’accion, emb de comentaris vius e un maxim d’informacions sus lo rescòntre. Composicion dei equipas, forma dei jugaires, estatisticas, contèxt dau rescòntre, reaccions e actualitat dau fotbòl: FotPantai enriquisse lu sieus comentaris per vos permetre de mancar pas ren de cen que si debana sus lo terren e a l’entorn dau terren.
Un rescòntre, doi biais de seguir FotPantai:
- A la ràdio: retrobatz lu comentaris en dirècte sus Ràdio Nissa Pantai.
- Sus Facebook Live: seguissetz en vidèo en dirècte lu comentators a l’ecran, li sieus analisis e li sieus reaccions dau temps dau rescòntre.
Emb aquesto novèu format, FotPantai perseguisse la sieu evolucion e renfortisse lo sieu ròtle d’apontament de non contornejar per seguir l’OGC Nissa en dirècte e en nissart, emb una emission totjorn mai viventa, informativa e pròcha dei sieus auditritz e auditors.
Emb FotPantai, viuretz lu rescòntres de l’OGC Nissa coma se siguessiatz a costat dei comentators.
Daissar un comentari